3 tiguwang naangol sa fluvial parade

CEBU, Philippines - Duha ka lola ang nabuthan sa pabuto ug laing usa ka lolo ang nahagbong sa dagat kagahapon sa buntag atol sa gipahigayong fluvial procession ni Senyor Santo Niño diha sa Mulle Osmeña wharf sa dakbayan sa Mandaue ug diha sa Pier 6 sa siyudad sa Sugbu.

Ang duha ka lola nga gidali pagtabang sa mga sakop sa Emergency Rescue Unit Foundation (ERUF) ug gidala sa Lapulapu District Hospital giila nga sila si Genara Pantinople 58, nga taga Rodriguez St. ug Angela Pulvera 58, nga taga Timpoloc St., pulos sa dakbayan sa Lapulapu.

Si Pantinople nakaangkon og first ug second degree burns sa iyang nawong samtang si Pulvera nakaangkon og first degree burn sa iyang liog human kalit nga napunta kanila ang usa ka kwitis. Ang maong pabuto lakip sa ‘sinturon ni Hudas’ ang gidagkutan sa usa sa mga pundok sa mga tawo diha sa wharf dihang nagkaduol na kanila ang nag-aginod nga Galleon nga gisakyan sa Senyor Santo Niño ug Birhen sa Guadalupe.

Apan inay molupad sa ibabaw ang kwitis milupad kini padulong ngadto nila ni Pantinople ug Pulvera nga nagtupad niadtong tungura ug maoy nangabuthan ilang nawong ug suwang.

Daling gitabang ang duha ka lola sa mga sakop sa ERUF apan walay nakabantay ug nitumbok si kinsa kadtong mga tawo nga nagpabuto niadtong higayona.

Sa laing bahin, tungod sa pagpaabot sa paglabay sa galeyon sa Senyor Santo Niño nakatulog ang usa ka Ceferiano Bering ug nahagbong sa dagat kagahapon nga nakaingon sa iyang pagkasamad sa iyang tuong kamot ug ulo.

Matud pa nga si Bering diha naglingkod sa ngilit sa pantalan pasado alas-7 sa kabuntagon uban sa iyang kabanay ug asawa nga naghuwat sa fluvial procession apan nakuratan nalang ang mga tawo sa dihang kalit kining nahagbong sa dagat hinungdan nga daling gitabang kini sa iyang pamilya.

Duha ka wala mailhing mga crew sa duha ka barko diha sa duol ang daling nangambak sa dagat ug gitabangan si Bering.

Sa dihang na-interbyu sa sibyaanang DyHP kagahapon, si Bering mitug-an nga nakatulog siya hinungdan nga siya natagak sa dagat. Si Bering gidala sa tambalanan aron matambalan. (BANAT NEWS)