Makililimos panghipuson sa dakbayan

CEBU, Philippines - Nakaalerto karong panahona ilabi na ugmang adlawa ang Cebu City Anti Mendicancy Task Force nga (CCAMTF) pakgangon ang mga manglimos nga mopahimulos gumikan sa pagdagsang sa mga tawo nga mosaksi sa Sinulog 2011.

Sumala pa ni Isabelita Ganub, hepe sa CCAMTF   nga gidoble nila karon ang ilang operasyon sa pag-rescue ngadto sa mga manglilimos diin kasagaran niini nagikan pa sa nagkadaiyang dapit sa probinsya.

Sugod sa buwan sa Enero karong tuiga, napakgang na nila ang 31 ka mga Badjao nga kusog manglimos sa kadalanan ingon man usab sa mga pasahero sa PUJ.

Gipahimangnoan usab ni Ganub ang publiko nga dili tagaan ang mga manglilimos sa kadalanan aron dili kini manganad nga base sa City Ordinance 1631 nga dili puwede mohatag ang tawo og kwarta ngadto sa makililimos aron dili sila makamulta og P1,000.

“Dili man gyud na malikayan nga dunay mga tawo nga dali ra kaayo maluoy, mas maayo nga ang ilang tabang adto nila idiretso sa mga social welfare institutions . Kay kung tagaan man gud ang mga manglilimos, maanad na sila, unya dili nana sila ganahan motrabaho kay masulod naman sa ilang huna-huna nga mas maayo manglimos na lang kay paspas ang kwarta,” nagkanayon si Ganub.

Nakigtambayayong ang CCAMTF sa onse ka mga police stations sa siyudad aron labing molig-on ang ilang puwersa sa pagpakgang sa mga manglilimos.

Sumala pa ni Ganub nga   mga bata kasagaran ang mga makililimos ug ilang ipatawag ang mga ginikanan niini sa higayon nga ma-rescue nila ang mga bata.

Gibutyag usab ni Ganub ang mga lugar nga kasagaran dagsaan sa makililimos, kini naglangkob sa   Colon, Jones, Mango Avenue, Gorordo, ug dalan Escario. (BANAT NEWS)