CEBU, Philippines - Pormal nang gitunol sa kagamhanan sa lalawigan sa Sugbo ang dugang tabang alang sa mga nabiktima sa landslide didto sa barangay Mayana, usa ka bukirang barangay sa lungsod sa Naga sa miaging mga adlaw. Si Provincial Social Welfare and Development Office head, Marivic Garces maoy personal nga mitunol sa P40 mil nga cash ngadto sa Social Welfare Officer sa lungsod sa Naga Delia M. Tibay kinsa mao usab ang mihatag sa maong kantidad ngadto sa nabiktima sa landslide sa barangay Mayana niadtong milabay nga tuig.
Gitunol ni Garces ang maong kantidad maoy isip tabang sa kagamhanan sa lalawigan ubos sa pamunoan ni Gobernador Gwendolyn Garcia aron usab hinayhinay nga makatukod og balay ang mga biktima.
Ang cheke nga balor og P40 mil maoy dugang hinabang sa kagamhanan ni Garcia alang sa mga biktima kinsa nawad-an og mga kabalayan human dahilii sa bagang yuta ug mga bato.
Matud pa sa Social Welfare Officer sa lungsod sa Naga nga ang mga biktima mipabarog na og balik sa ilang mga balay human sila tunoli og hinabang sa kagamhanan sa Naga ug sa Provincial Government niadtong nakalabay nga tuig.
Si Garcia walay undang sa pagtunol og hinabang sa mga nabiktima sa katalagman mahisakop man sa kagamhanan sa Lalawigan sa Sugbo o dili. (BANAT NEWS)