Arsobispo Palma mao nay mangulo sa simbahan sa Sugbu

CEBU, Philippines - Pormal nang milingkod isip Arsobispo sa Simbahan sa Sugbu si Archbishop Jose Palma human sa gipahigayong Episcopal Installation nga gihimo sa simbahan sa Cebu Metropolitan Cathedral of the Holy Name of Jesus.

Ang mubo ug simpleng installation rites gisugdan sa grand entrance nga gipahigayon sa maong simbahan diin nag-una sa pagsulod ang 70 ka Obispo sa nagkadaiyang lugar sa nasud ug gisundan ni Archbishop Palma ug sa kataposan mao si Archbishop Ricardo Cardinal Vidal.

Adunay pipila ka seremonyas nga gipahigayon nga gihubad sa sinulti-ang Latin human niini misunod ang usa ka congregation address ni Cardinal Vidal.

Atol sa maong address nangayo og pasaylo si Vidal ngadto sa katawhan sa iyang mga nabuhat nga kapakyasan samtang nagpasalamat usab siya sa katawhan sa pagsabot kaniya.

“As your steward for 29 years, I ask forgiveness for my failures and I thank you for the presence and understanding that you’ve given me in spite of my lapses and gratefully,” pasabot pa ni Vidal

“I would like to thank my collaborators from different society from the government from local, national and provincial, also the military, the judiciary, the business and the social, you’ve been part of my ministry by optimizing my service to the people of God,” dugang pa ni Vidal. Subling giagni ni Vidal ang mga Sugboanon nga suportahan si Palma. “Walk with him and give him the same support that you have given to me. I also commit myself to support Archbishop Palma as well to the best my old body would allow,” matud pa ni Vidal.

Human sa maong Congregation address gipahigayon na dayun ang opisyal nga pagtunol ni Cardinal Vidal sa iyang posisyon isip arsobispo sa Sugbo pinaagi sa pagpalingkod kang Palma sa labing dako nga lingkuranan sa maong simbahan nga gitawag og “Cathedra” gisunod og tunol ni Vidal ang pastoral staff kang Palma.

Atol sa ebanghelyo sa maong Santos nga Misa nga giselebrar ni Manila Archbishop Gaudencio Rosales miingon nga bisan paman ang arsobispo maoy pastol nagkinahanglan kini og kooperasyon sa katawhan.

“He also needs to take care of his clergy for they contribute to the development of his flock. Be a good example of this flock, open the eyes of the blind, for them to see the message of God,” pahimangno pa ni Rosales kang Palma.

“This is love, an overwhelming love of God. I could not believe. I thank him for his trust,” matud pa sa mensahe ni Palma mahitungod sa iyang instalasyon.

Samtang sa laing bahin, dako ang kalipay ni Rosales sa diha nga iyang nasayran nga magpabilin sa Cebu si Vidal.

Si Vidal kinsa daan nang mipahibalong andam gihapon siyang moserbisyo sa Simbahan ug sa mga Sugbuanon bisan paman sa iyang pagretiro subling mipasalig nga magpabilin siyang motabang bisan unsa nga oras kun kini makaya pa sa iyang lawas.

“I am willing to serve as much as I can, I am at his service,” matud pa ni Vidal. (BANAT NEWS)