Bombero way helmet kritikal

CEBU, Philippines - Talandugon ang kahimtang sa usa ka bombero human kini nalamba ug napantok ang ulo sa sementadong karsada kay walay helmet, dihang nabangga   ang iyang motorsiklo sa gikasugat niining sakyanan didto sa barangay Luray-2 siyudad sa Toledo niadtong Miyerkules sa gabii.

Ang biktima mao si FO2 Benjamen Diotay, hingkod nga taga Balamban apan nadistino sa Aloguinsan Fire Station, samtang ang drayber sa Isuzu D’max nga iyang gikabangga mao si Melljem Tan Alegado, hingkod ang panuigon.

Matod ni SPO3 Carmilito Hornales sa Toledo City Police dihang nahinabi sa Banat News nga ang biktima gikan sa Poblacion, Toledo nga nagpaingon ngadto sa Balamban dihang pag-abot sa Luray-2 nagkadinasmagay ang iyang motor ug ang sakyanan ni Alegado.

Ang biktima kinsa walay helmet niadtong tungora, maayong pagkabunal ang ulo sa karsadang sementado ug nalandig kini sa South General Hospital sa lungsod sa Naga.

Samtang si Alegado boluntaryo usab nga nitahan sa iyang kaugalingon sa buhatan sa kapolisan sa Toledo diin siya gitanggong. (BANAT NEWS)