Hapones namatay, shabu kit-an

CEBU, Philippines - Patay nang napalgan ang usa ka Hapon sulod sa giabangang lawak sa usa ka apartment sa sitio Casanta, Soong barangay Mactan dakbayan sa Lapulapu kagahapon sa buntag.

Base sa gihuptang passport sa maong hapon kini giila nga si Masahira Yonekawa, 77, temporaryong nagpuyo sa maong dapit.

Sa imbestigasyon ni SPO2 Ernesto Francisco sa Homicide Section walay foul play silang nakita sa lawas niini ug wala usab sila’y nakitang kaguliyang sulod sa maong lawak.

Apan sa pagsusi sa kapolisan sa butanganan og antyohos lima ka paketeng gidudahang shabu ug drug paraphernalia ang sulod niini.

Matud pa ni Mactan barangay kagawad Rosalinda Inihao nga mao usab ang tag-iya sa gipuy-an sa maong Hapon nga mga alas 8:00 kagahapon sa buntag iyang gisayo og sukot ang asawa sa Hapon human kini wala makabayad sa abangan sulod na sa tulo ka bulan, apan maoy iyang nakita nga nagbuy-od na sa sala si Yonekawa nga wala nay kinabuhi.

Si Inihao nagkanayon nga daghan na siyang nadunggan nga bisan kinsang babaye ang mosulod sa giabangang lawak sa Hapon matag gabii sukad kini mipuyo sa ilaha gikan sa lungsod sa Moalboal lalawigan sa Sugbu sa milabay’ng Hunyo 15, 2010. - BANAT NEWS