Gwen mosalmot sa Sinulog

CEBU, Philippines - Si Gobernador Gwendolyn Garcia miingon nga dili lamang ang Sinulog Mardigras ang iyang salmotan, kun dili buot usab siyang moapil sa fluvial procession karong Sabado, bisperas sa kapistahan sa mahal nga Senior Santo Niño.

Sumala pa ni Garcia nga interesado usab siyang mosakay og barko nga mokuyog sa fluvial procession.

Si Garcia nagkanayon nga kontento ra kaayo siyang mosalmot sa maong kalihokan bisan og dili ang galeon nga maoy sakyan sa imahe sa Senior Santo Niño ang iyang masakyan.

Apan gitataw sa gobernador nga ang iyang pag-apil sa fluvial procession mag-agad lamang sa imbitasyon nga iyang madawat gikan sa mga opisyales sa dakbayan sa Sugbo o kaha sa simbahan.

Nasayran nga sa miaging tuig, hilom nga mikuyog si Garcia sa fluvial procession pinaagi sa pagsakay sa usa sa mga barko nga nagsunod ug nagsubay sa fluvial procession.

Kini human siya imbitaha sa usa ka suod nga higala nga nanag-iya og usa ka yati ug deboto usab sa milagrosong bata, Sr. Sto. Niño.

Dugang pa sa gobernador nga kabahin na sa iyang pagsakripisyo ang pag-apil sa mga kalihukan sa kapistahan sa mahal nga Sr. Sto. Niño agi og pasalamat tungod sa proteksyon ug tabang sa kalampusan sa iyang pagdumala sa kagamhanan sa lalawigan sa Sugbo. - BANAT NEWS