Trauma center ibutang sa VSMMC

CEBU, Philippines - Ilusad sa Integrated Provincial Health Office sa dili madugay ang bag-o niining programa aron daling maatiman ang mga pasyente sa mga district hospital sa Lalawigan sa Sugbo apil na sa Vicente Sotto Memorial Medical Center (VSMMC).

Matud pa ni Dr. Cristina Giango, hepe sa Integrated Provincial Health Office nga ang ilang i-implementar karong tuiga mao ang programa sa disaster management aron magkahiusa ang paagi sa tanang mga district hospital sa pag-atiman sa mga pasyente ilabina kun may trahedya o kalamidad nga mahitabo.

Matud pa ni Giango nga ang tanang hepe sa mga district hospital ug lakip na sa VSMMC nagkasabot usab sa pagbutang og trauma center aron madali ang pag-atiman sa mga pasyente sa kalamidad gikan sa probinsiya.

Kini tungod kay ubos sa bag-ong programa nga ipatuman sa administrasyon ni Gobernador Gwendolyn Garcia malibre ang mga pasyente nga biktima sa katalagman.

Hinoon giklaro ni Dr. Giango nga gipinalisar pa ang mga kasabutan alang sa nahisgutang programa kay anaa na kini karon sa Hunta Probinsyal diin nalakip ang usa ka dakong kompaniya sa cell phone nga maoy responsable sa mga kahimanan sa komunikasyon nga gikinahanglan sa kalungsoran sa panahon   sa katalagman.    (BANAT NEWS)