Kooperasyon giawhag

CEBU, Philippines - Nanawagan si Mayor Rama sa publiko nga mokooperar sa siyudad aron tulin ang dagan sa umaabot nga Sinulog Grand Parade karong Enero 16.

Partikular nga gipunting ni Rama mao nga dili magpataka og labang ang mga tawo atol sa Sinulog aron dili kini makabalda sa parada. 

Suma pa sa mayor nga responsibilidad sa matag tawo nga motubag sa ilang obligasyon aron hapsay ang pagsaulog sa kapistahan ni Sr. Sto Niño.

Amenado ang mayor nga mobaha ang mga bisita sa maong adlaw ilabi na sa maayong feedback nga iyang nadawat sa hugyaw nga presentasyon sa bag-ohay pa lang nga Sinulog sa Kabataan sa   Lalawigan ug sa Dakbayan.

“Nakita gyud nako kung unsa kadaghan sa mga tawo nga misaksi sa Sinulog sa Kabataan, busa kinahanglan napud ko nga makigtigom og balik sa mga polis kay segurado nga mosamot kini kadaghan sa Sinulog,” nagkanayon ang mayor.

Midugang ang mayor nga samtang nagkadugay ang Sinulog, nagkaanam usab kalig-on ang mga nangapil niini ilabi na sa natad sa moves, props ug costume.

Miingon siya  nga ang Sinulog maoy usa sa giisip nga pinakasikat nga festival sa Pilipinas gumikan kay motuyo gyud pag-anhi ang mga taga laing nasud aron mosaksi sa maong kalihukan.

Samtang ang executive director sa Sinulog Foundation Inc nga si Ricky Ballesteros nagkanayon nga kompleto na ang preparasyon alang sa piyesta apan ang dagan lang sa panahon maoy ilang gikabalak-an.

Apan matud pa niya nga naandan na sukad kaniadto nga magpadayon gihapon ang parada bisan dunay pag-uwan.

Gipahibalo usab ni Ballesteros nga dili angay mabalaka ang mga dancer nga mosayaw sa entablado kay giwagtang nila ang dangog niini aron nga dili madakin-as ang mga mananayaw sa Sinulog.

Gipaabot nga motabang usab sa crowd control mao ang nagkadaiyang tinun-an sa tunghaan sa siyudad inubanan   sa mga sundalo, polis ug mga barangay tanod.   (BANAT NEWS)