CEBU, Philippines - Nagkurog pa sa kalisang ug nagtibi ang tulo ka mga batan-on nga nahidangat sa buhatan sa kapolisan kinsa gitulis sa nagbinugtong nga tulisan nga nagsakay og bisiklita sa reclamation area sa dakbayan sa Mandaue alas 10 pasado ang takna sa miaging gabii.
Ang tulo ka mga biktima mao sila si Michael Paterno, 22, ulitawo, nga taga Banawa sa dakbayan sa Sugbo, Jovy Honey Quilope, 19, dalaga nga taga Sunrise Village, sa barangay Pardo ug Quincy Alivio, 19, nga taga Singson Village sa barangay Guadalupe sa dakbayan sa Sugbo.
Matud pa ni PO2 Herbert Pelayo sa Police Station 1 sa Mandaue City Police Office (MCPO) nga nakuhaan ang mga biktima sa ilang mga cellphone, salapi ug uban pang butang sa nag-inusara apan wala hiilhing tulisan.
Gisugilon sa mga biktima nga naglakaw sila sa maong lugar samtang nagpaabot og sakyanan pauli sa dakbayan sa Sugbo dihang kalit lang gihunongan sila sa wala hiilhing lalaki nga nagsakay og bisiklita ug gitionan sila og armas de fuego nga wala matino ang kalibre.
Unya pinaagi sa isog kaayong tingog gipangayo ang ilang mga cell phone ug uban pa nilang butang uban sa hulga nga kun magdumili sila pamusilon sila.
Unya human makuha ang ilang mga butang dali kining nakapadagan sa bisiklita pahilayo sa maong dapit. - BANAT NEWS