Dalaga gitulis sa nagmotor

CEBU, Philippines - Nasakiyo sa mga tulisang de motor ang mga personal nga butang sa usa ka dalaga   nga gitulis niini didto sa Jaime street, barangay Paknaan, dakbayan sa Mandaue sa miaging kaadlawon.

Ang biktima giila sa kapolisan nga si Reijel Garcia, hingkod nga taga Zone Paliya sa maong barangay.

Ang mga butang nga gisakiyo sa duha ka wala hiilhing tulisan nga nagsakay og motorsiklo mao ang iyang cell phone, salapi ug mga alahas.

Sumala ni PO2 Rangier Lopez ug PO1 Marlawe Bimangbang sa Mandaue City Police Office nga ang biktima naglakaw sa maong lugar paingon sa iyang trabaho dihang kalit lang nga mihunong ang usa ka motorsiklo nga giluwanan sa duha ka lalaki.

Unya ang angkas niini maoy mition kaniya og armas de fuego nga wala hisayri ang kalibre uban sa pagdeklarar nga tulis.

Matud pa sa biktima sa kabalaka nga patyon siya gihatag nalang niya ang iyang cell phone, cash nga P2 mil, ug mga alahas.

Midugang ang biktima nga human makuhai siya sa maong mga butang dali kaayong nakasirit pahilayo sa maong lugar ang maong mga tulisan.

Sa pagkakaron gipangita pa sa kapolisan ang maong mga tulisan. - BANAT NEWS