Tubig pabantayan

CEBU, Philippines - Ang kagamhanan sa lalawigan sa Sugbo mipalanog usab sa panawagan sa Department of Health (DOH)-7 ngadto sa mga opisyales sa kalungsoran nga monitoron pag-ayo ang mga instalasyon sa tubig sa ilang tagsa-tagsa ka lugar aron dili na usab motumaw og balik ang diarrhea ug tipos tungod sa kagawong tubig nga ilang nainom.

Ang Kapitolyo pinaagi ni Integrated Provincial Health Office (IPHO) miawhag sa mga mayor ug ubang mga opisyales sa kalungsoran sa lalawigan nga kanunay nga mosusi sa ilang water system sa tagsatagsa nila ka lugar.

Matud pa ni Provincial Health Officer, Dr. Cristina Giango nga niining pagpunay og ulan-ulan, taas kaayo ang kahigayonan nga masudlan og kagaw ang mga tinubdan sa imnonong tubig kun dili maayong pagkataod ang mga linya sa tubig.

Hinuon gitataw ni Dr. Giango nga gawas sa mga mayor nga gipamonitor sa mga instalasyon sa tubig sa kalungsoran, giapil na usab kini sa trabaho sa mga health inspector sa lalawigan aron higpit nga masubay ang mga paagi nga malikayan ang nagkalain-laing matang sa sakit. Kahinumdoman nga ang hugaw sa tawo nga misagol sa tubig sa mga tubo niini sa dakbayan sa Danao nahimong hinungdan sa pagtumaw sa diarrhea sa maong lugar, samtang tipos usab ang nasinatian sa mga molupyo didto sa lunsgod sa Alegrea ug sa Carmen hinungdan nga daghang mga tawo ang nalandig sa tambalanan. - BANAT NEWS