Russian national nasaag

CEBU, Philippines - Usa ka Russian national kinsa wala hiilhi mitungha didto sa buhatan sa kapolisan sa Cordova sa miaging adlaw.

Si PO3 Rolando Tagsip sa kapolisan sa nahisgotang lungsod nga nahinabi sa Banat News miingon nga niadto pang miaging Huwebes sa gabii ihatod ang maong tawo sa ilang buhatan gikan sa dakbayan sa Mandaue pinaagi sa drayber sa multicab.

Gibanabana nila nga anaa kini sa 75 anyos ang pangidaron apan wala nila makuha ang ngalan kay dili sila magkasinabot tungod kay dili kaantigo mosulti og Enenglis ang maong Ruso, dugang pa ni Tagsip.

Unya wala usab kini magdala og ID aron unta pag-ila sa iyang ngalan ug address.

Matud pa ni PO3 Tagsip nga ilang gitugyan ang maong langyaw ngadto sa buhatan sa Municipal Social Welfare nga gipangulohan ni Josepina Montebon.

 Ang maong langyaw walay dala bisan unsang butang gawas sa iyang senina nga tapot sa lawas busa gihatagan kini og sapot sa pipila ka mga Cordovanhon , gipakaligo ug gipakaon dihang mipundo pa kini sa buhatan sa kapolisan.

Hinuon si Montebon miingon nga ilang itugyan ngadto sa rehiyonal nilang buhatan sa Deparment of Social Welfare and Development (DSWD) ang maong langyaw alang sa tukmang pag-atiman niini.

Nanawagan usab si Montebon sa publiko ilabi na kadtong hingtungdan nga higala ug nakaila sa biktima nga moduaw sa ilang buhatan aron sa pagkuha niini. (BANAT NEWS)