5 tindahan sa autoparts gilungkab

CEBU, Philippines - Lima ka tindahan nga namaligya og mga pisa sa mga sakyanan ang gilungkab sa wala pa mailhing responsabli human gitabas ang sin sa atop ug gilangkat ang kisame diin maoy giagian paingon na ngadto sa tindahan.

Gituohan sa kapulisan nga niana pang gabii o kagahapon na sa kaadlawon gilungkab ang lima ka tindahan ug namatikdan nalang sa mga empleyado kagahapon na sa buntag atol sa ilang pagpangabli. Ang gilungkab mao ang Meatipid nga nakuhaan og P6 mil, Security Auto Supply nakuhaan og P13 mil, Pioneer Auto Supply P7 mil, Cebu Downtown Auto Supply P5 mil, ug Glorious Auto Supply P8,700 nga mga cash nga pulos nag-okupar sa Gochan Building sa dalan Leon Kilat ning dakbayan.

Si PO3 Fredilson Codilla sakop sa Crime Scene Investigation Unit (CSIU) sa Cebu City Police Office nagkanayon sa mga tigbalita nga ilang nakita ang lama sa tunob sa mga tiil ug dunay tsinelas nga nahabilin ug kalo nga gituohang iya sa wala mailhing manglungkabay. 

Ila usab gikuhaan og fingerprint ang kaha sa lima ka tindahan diin didto gipamutang ang kwarta nga halin pa niadtong Miyerkules. Si Supt. Pablo Labra II, Deputy City Director for Operation nga nahinabi sa mga tigbalita nagkanayon nga usa sa ilang tan-awon ang anggulo sa inside job tungod kay dunay guwardya ang maong building ug adto sa luyo magpwesto apan wala makabantay sa pagkatkat sa mga kawatan.  (BANAT NEWS)