Coast Guard maghigpit sa fluvial

CEBU, Philippines - Mipasidaan ang Philippine Coast Guard –Cebu nga dili nila tugutan nga makaapil sa fluvial procession karung Sabado sunod semana bisperas sa Sinulog Mardigras kadtong mga sakyanan sa kadagatan sama sa motorbanca ug barko nga dili magparehistro sa ilang buhatan.

Nunot niini gipahibawo ni Capt. Anelito Gabisan, deputy commander sa Coast Guard District Central and Eastern Visayas pagkakarun padayun na ang Cebu Coast Guard ubos sa pagpangulo ni Commander Rolando Punsalan sa tanang mga barko ug motorbanca nga gustong mo-apil sa fluvial parade. Gipasabot ni Gabisan nga estriktong polisiya ang gipatuman karun sa pagpanawat og mga sakyanan sa kadagatan nga makaapil aron malikayan ang aksidente sa kadagatan.

Ang mga rekisitos gikinahanglan nga rehistrado ang motor banca o barko nga moapil sa fluvial parade, gikinahanglan nga lisensyado usab ang kapitan niini ug gikinahanglan nga masuta ang seaworthiness sa barko.

Samtang si Punsalan gitakdang mosugyot og mga kausaban sa polisiya sama sa pagdili pagkarga og pabuto o ilimnong makahubog diha sa mga lantsa ug motorbanca samtang ipahigayun ang procession aron paglikay sa disgrasya.

Kini aron dili masubli ang nahitabu sa milabay’ng mga tuig nga dunay nalunod tungod sa firecracker. Ang deadline sa registration karong Enero 15. (BANAT NEWS)