CEBU, Philippines - Gibana-banang moabot ngadto sa dul-an 15,000 ka mga debotos ang miduyog sa tinuig nga “Walk with Jesus” kagahapon nga nanukad sa Fuente Osmeña ug natapos sa Basilica Minore del Sto. Niño kagahapon sa kaadlawon.
Bitbit ang mga rosaryohan, kandila ug mga rebolto ni Sr. Sto Niño lakip na ang mga imahe sa Birhen Maria, nangaliya ang mga deboto samtang nagpila sa taas nga prosesyon nga mipuno sa kadalanan sa Osmeña Blvd. paingon ngadto sa basilica.
Ang maong prosesyon gitapos sa usa ka Santos nga Misa ngadto sa Basilica Minore del Sto.Niño nga gipangulohan ni Rev. Fr. Rodolfo A. Bugna.
Kini usab ang nagsilbeng unang adlaw sa Misa Novena nga molungtad ngadto sa siyam ka adlaw diin ipahigayon usab ang laing foot penitential procession nga mao ang “Walk With Mary.”
Gawas sa mga deboto, gatusan usab ka mga security personnel gikan sa Philippine National Police, Cebu City Traffic Operations Management (CITOM) ug mga barangay tanod ang gipakatap sa kagamhanan subay sa rota nga giagian sa prosesyon.
Kagahapong adlawa usab gipasa nila ni Dr. Jose “Dodong” Gullas ang chairman sa The Freeman ug Banat News ug iyang kapikas Nena Gullas ang renda isip Hermano Mayor ug Hermana Mayor ngadto nila ni Calvin Carlos Discaya ug asawa niini nga si Jessica Rosa isip Hermano ug Hermana Mayores karong tuiga. - Uban ni Stephani J. Solante (BANAT NEWS)