CEBU, Philippines - Usa ka 3-anyos nga batang babaye ang labing unang namatay sa dengue niining pipila palang ka mga adlaw pagsulod sa tuig 2011 dinhi sa dakbayan sa Sugbo subay sa rekord sa City Health Department.
Gibutyag ni Dorenda Macasucol ang assistant City Epedemiology sa City Health Department nga ang labing una nga biktima sa dengue ug namatay karung tuiga mao si Lizel Hornales, 3, taga sitio Kalahoan barangay Talamban ning dakbayan sa Sugbo.
Subay sa rekord ang biktima unang gidala ug gi-admit sa Cebu City Medical Center niadtong petsa 1 ning buwana adlaw’ng Sabado atol gyud sa Bag-ong Tuig apan tungod kay migrabe na ang pagkuyanap sa dengue virus wala na gyud matabang pa sa mga doktor ug namatay kini nianang pagka petsa 2 adlaw’ng Domingo. Gihulagway nga grabe na ang bata dihang gi-admit sa tambalanan hinungdan nga wala na madala sa mga doctor ang pagsalbar sa kinabuhi niini.
Nunot niini gi-awhag ni Macasucol ang publiko ilabina ang mga ginikanan nga dad-on dayun sa doktor aron mahiling kadtong mga batang hilantan.
Gikan niadtong petsa 1 ug 2 ning buwana pagsud gyud sa bag-ong tuig moabot na og unom ka pasyente sa dengue ang na-admit diha sa CCMC ug Vicente Sotto Memorial Medical Center (VSMMC). - BANAT NEWS