'Mahuyang' gi-salvage

CEBU, Philippines - Gigapos sa packaging tape ang mga tiil ug gibinaklid ang kamot ug gitaptapan ang nawong hangtud na sa liog ang usa ka gidudahang mahuyang nga napalgang patay nga gituohang biktima sa salvage.

Ang patay’ng lawas adunay mga samad pinusilan sa ulo, lawas ug tuong bukton ug gibilin sa kanal sa Transcentral Hi-way sa sitio Buwawan sa barangay Pung-ol, Sibugay siyudad sa Sugbu.

Ang biktima nalabyan sa usa ka Marino Englatera, habal-habal drayber sayo kagahapon sa buntag nga naghatud og pasahero sa barangay Gaas lungsod sa Balamban.

Sa pagsuwat ning balita kagahapon sa hapon wala pa mailhi ang biktima sanglit wala pay mi-claim ug mitaho sa kapulisan.

Gihulagway sa kapulisan ang biktima nga nagpangidaron 35 ngadto sa 40-anyos, mubo ang buhok, gibana-banang gitas-on nga 5’4”, kasarangan ang gidak-on sa panglawas, labong ang buhok apan mubo ra, dunay tattoo sa tuong bukton nga Jaycam “Z” nagsul-ob og short nga slacks kolor blue, camouflage nga brief, t-shirt nga stripes nga may kombinasyong dark green ug puti ug wala nay tsinelas.

Siyam ka kabhang sa .45 nga kalibre sa armas, duha ka deformed slugs ug tulo ka fragments ang nakuha sa crime scene. Sa gihimong imbestigasyon ni SPO4 Alex Dacua, PO2 Judan Batucan, PO2 Michael Codaste ug PO2 Edario Manatad nagbutyag nga ang mga residente sa dapit nakadungog og sunodsunod nga buto sa pusil pasado alas-2 kagahapon sa kaadlawon apan wala nila susiha ang dapit

Si Englatera mibutyag sa kapulisan nga human niya madungog ang sunod-sunod nga buto sa armas mitimbakuwas siya sa iyang gihigdaan ug iyang gitan-aw ang gigikanan sa buto ug iyang nakit-an ang usa ka sakyanan nga van kolor itom nga nagdaling mibiya sa crime scene.

Si Wilfredo Pador, tanod mao nay gipahibawo ni Englatera nga dunay tawong iyang naagian sa dapit nga gituuhang gi-salvage.

Si PO2 Codaste nga nahinabi sa Banat News nagkanayon nga blangko pa gyud sila si kinsa ang responsable sa krimen. - BANAT NEWS