Tomas gihagit ni Gwen

CEBU, Philippines - Gihagit ni gobernador Gwendolyn Garcia si Representante Tomas Osmeña sa habagatang distrito sa dakbayan sa Sugbo Cebu nga mangampanya usab sa mga tawo kung adunay mga private developer nga mougmad og mga luna sa dapit sa Banilad diin mahimutang ang giplanohang Ciudad project sa kagamhanan sa lalawigan sa Sugbo.

Kini ang reaction sa gobernador sa pamahayag ni Osmeña nga hugot niyang babagan ang Ciudad Project sa Kapitolyo tungod kay mao kini makapasamot sa kahuot sa trapiko sa Banilad-Talamban area.

Matud pa sa gobernador nga ang trapiko sa nahisgutang lugar responsibilidad ni Mayor Michael Rama ug dili ni Tomas Osmeña sanglit kongresista man kini sa Cebu South District ug dili sa North district.

Nunot niini gihagit ni Garcia si Osmeña nga ipakita kun unsay nahimo niya atol sa iyang termino sa pagsulbad sa trapiko sa Banilad-Talamban area, ingon man sa grabing baha ug ang kabaho sa Inayawan Landfill.

Sa nasayran nga ang gihimo nga ordinansa sa dakbayan sa Sugbo para babagan ang pagtukod sa Ciudad project sa Kapitolyo wala naglakip sa mga pribado nga buhatan nga did-an sa pag-ugmad sa Banilad –Talamban area.

Alang kang Garcia wala gyuy kaangayan sa tanan ang mga plano ni Osmeña kay alang ra gyud sa kaugalingon niyang kapretso.

Kay alang sa gobernador nga kun babagan ni Osmeña ang Ciudad project nga iya sa Kapitolyo, dili usab niya angayang tugotan ang mga private developer nga mougmad sa kadaplinan sa kadalanan sa Banilad.

Apan nakita sa gobernador nga daghan kaayong mga pribadong negosyante nga gitugotan ni Osmeña nga makatarok sa ilang dagkong negosyo sa barangay Banilad. - BANAT NEWS