Mananagat sa Leyte napadpad sa Danao

CEBU, Philippines - Usa ka 15-anyos nga mananagat napadpad sa kadagatan sa syudad sa Danao human sa tulo ka adlaw niining palutaw-lutaw sa dagat sakay sa iyang wala na moandar nga pumpboat gikan sa Leyte.

Ang maong bayong-bayong mao si Mark Sanico, 15, lumad nga taga Villaba, Leyte.

Sa iyang asoy sa kapolisan sa Danao Police Station, si Sanico mibutyag nga namasol   siya nga nag-inusara niadtong Enero 3 sa buntag sakay sa usa ka pumpboat dihang napagngan sa makina ang iyang sakyanan .

Tungod usab sa dili maayong panahon nagpauban-uban nalang siya sa bawod hangtod nga kagahapon sa buntag nabangalan siya sa mga mananagat sa barangay Guinsay , dakbayan sa Danao.

Gi-rescue dayon siya nila ni Konsehal Roland Reyes   sa dakbayan sa Danao ug sa kaubang mga opisyal niini kinsa maoy mihatod sa maong batan-ong mananagat ngadto sa Danao City District Hospital.

Matud pa ni PO2 Cherry Pañares ang pangulo sa Womens and Children Protection Desk sa Danao Police Station nga puwerte nang luyaha sa maong batan-on gumikan sa kagutom.

Nasayran ni Pañares nga niadto pang Enero 3, katapusang nakakaon og pagkaon ang maong mananagat sa wala pa siya mogikan sa ilang balay aron mamasol.

 “Milagro gani lagi nga matawag nga naka-survive siya,” pasabot pa ni Pañares.

Midugang si Pañares nga ang apohan sa maong batan-on nangita na kaniya   sumala sa pamahayag sa kapolisan sa Villaba Police Station nga gitawgan sa mga polis sa Danao.

Gipaabot sa kapolisan sa Danao nga kuhaon ang maong batan-on sa iyang mga kabanay gikan sa Leyte. - BANAT NEWS