Dealer sa karne mireklamo

CEBU, Philippines - Ang Meat Importers & Traders Association (MITA) miawhag sa Department of Agriculture (DA) ug sa National Meat Inspection Services (NMIS) sa pagpalawom og tuki kabahin sa implementasyon sa Administrative Order (AO)-22 nga mao ang pagsakmit sa mga imported nga karne nga wala ibutang sa storage sa kamerkadohan.

Ang uban gisulod og storage apan wala lang ikabutang sa tukmang gibugnawon ug gipanakmit pa gyud.

Kay ang nahisgutang mga karne giingong dili pweding humolan lang og ice tungod kay mawagtang ang pagka-frozen niini ug sa maong sitwasyon dugokon na kini sa mga kagaw nga makadaot sa panglawas sa tawo, sumala sa maong balaod.

Ang Presidente sa MITA nga si Jesus Cham nagkanayon nga labing makahatag pa og maayong serbisyo ang NMIS ngadto sa publiko kung isentro nila ang ilang kalihukan sa pagwagtang sa “double dead” nga mga karne nga gitago-tago og pamaligya sa kamerkadohan.

Matud ni Cham nga angayan usab nga sutaon sa NMIS kung limpiyo ba ang paghikay sa mga local nga karne nga gipamaligya sa mga merkado.

Sa samang higayon iyang gipasabot nga ang mga karneng wala mangahalin dili unta tugotan nga himuon kining tocino, longganisa o humolan og mga lamas aron mapalit gyud sa publiko.

Si Cham miawhag usab sa NMIS nga hugtanon unta kining mopatuman sa kalimpiyo sa mga merkado ug dili pasagdang maghitak sa kahugaw ang mga sawog niini.

Unya kinahanglang bombahan gyud og mga disenfectant ang mga lamesa nga ladlaran sa mga karneng ibaligya, lakip na ang mga kutsilyong gamiton sa pagpanghiwa sa karne kinahanglang limpiyo kanunay, matud ni Cham.

Nagmahay si Cham kay gigukod pag-ayo ang mga imported nga karne, samtang ang mga lokal nga karne nga gipamitay sa mga stall sa kamerkadohan ug wala gani ibutang sa saktong storage walay labot sa maong AO.

Si Cham midugang nga ang lokal nga karne nga gibaligya sa mga merkado gikan sa pag-ihaw niini sa kaadlawon kun maabtan na og alas 10:00 sa buntag nga dili pa mahalin, dili na maayo tungod kay posibleng pan-os na kini ug peligro na sa panglawas sa publiko.

Ang NMIS ug DA giawhag usab ni Cham nga susihon ang pag-implementar sa AO-22 kung wala ba kini makahikaw sa benepisyo sa mga kabus nga konsumedor gikan sa pagpahimulos sa baratong karne. - BANAT NEWS