Carousel nga nakapatay gisusi

CEBU, Philippines - Gipasusi ni Mayor Michael Rama ang istado sa tag-iya sa carousel nga nag-operate sa carnaval  nga nahimutang sa Barangay Guadalupe ning dakbayan sa Sugbo.

Kini human sa insidente nga nahitabo sa maong dapit sa katapusang bahin sa Disyembre sa miaging tuig diin adunay kapin sa tuig pa nga bata ang nakuryentihan sa railing sa carousel. Kahinumdoman nga gidala sa tambalanan ang maong bata nga si Sam apan nakabsan ra usab kini sa iyang kinabuhi pagka-sunod adlaw.

“ Ako na ipa-check kung nganong naka-operate na sila sa carnival ug nganong ingon-ato ang nahitabo,” nagkanayon si Rama. Taud-taod na nga gidungog nga matud pa aduna na’y laing nakuryentihan sa maong carousel sa wala pa mahitabo ang insidente kalabot kang Sam.

Nagkanayon si SPO3 Roy Salazar sa Guadalupe Police Station nga gipasakaan na kagahapon og kaso sa mga kabanay sa biktima  ang tag-iya sa carousel nga si Manuel Villordon. Si Villordon gipasakaan og duha ka mga kaso nga naglangkob sa “reckless imprudence resulting to homicide”   ug reckless imprudence resulting to physical injury”.

Lakip usab sa napasakaan og kaso mao ang mga caretaker ug electrician sa carousel nga sila si Manuel Villordon, George Fonteras ug Junie Jumayao.

Nagkanayon si Salazar nga mohimo unta og settlement ang tag-iya sa carousel ngadto sa mga kabanay sa biktima   apan wala kini manugot.

 Dugang pa niya nga dili uyon ang mga biktima sa settlement gumikan kay sakit kaayo nila ang nahitabo kang Sam ug ulahi na kaayo ang lihok sa tag-iya sa carousel sanglit wala gyud kini motanyag og settlement sa dihang gitabang pa ang bata sa tambalanan.

Samtang gipahibalo ni Mayor Rama kagahapon nga andam mohatag og financial assistance ang kagamhanan sa siyudad ngadto sa kabanay sa biktima ug iya kini nga giawhag nga modangop sa Department of Social Welfare and Services (DSWS). - BANAT NEWS