Tomboy gitulis gipatay Ni Darrel Carumba ug Romeo Limpangog

CEBU, Philippines - Gidudahang gitulis una pa gipatay ang usa ka 53- anyos nga tomboy nga nakit-an nalang wala nay kinabuhi ug naputos sa samad dinunggaban ang kalawasan sulod sa pinuy-anan niini sa sitio Simboryo barangay Tayud lungsod sa Liloan niadtong Martes sa alas 6:45 sa hapon.

Ang biktima mao si Asteria Libotlibot Pepito, nagpuyo sa nahisgutang lugar. Matud ni SPO4 Remegio Elacion sa Liloan Police dihang nahinabi sa Banat News ang biktima nadiskubrehan nalang nga patay na sa usa ka Annie Nunez mga alas 6:45 sa gabii.

Subay sa imbestigasyon, ang biktima nakaangkon og dili mominos pito ka mga samad dinunggaban sa bukobuko ug tuong bahin sa lawas nga maoy gituohang hinungdan sa hinanali niining kamatayon.

Nasuta sab nga nahanaw ang duha ka mahalong cellphone sa biktima sigun pa sa asoy sa mga kabanay niini ngadto sa mga polis, samtang narekober usab sulod sa iyang kabinet ang P56,000 nga cash.

Dugang nakuhang impormasyon sa kapolisan nga niadtong milabay’ng bulan nahalinan og duha ka baka ang biktima nga mibalor og P80,000.

Si Nuñez ang unang nakakita sa biktima nga nagbuy-od sa hawanan duol sa lawak niini ug mao nay mitaho ngadto sa ilang ig-agaw nga si Celo Judaya kinsa maoy mitawag sa kapolisan.

Gisuwayan pa kini og dala sa tambalanan apan gideklara kining dead on arrival sa doktor nga mihiling niini.

Nasayran usab sa kapolisan nga sa udto pa nianang adlawa nakit-ang nakig-estorya ang biktima sa sinaligan niini nga si Gilbert Gingala Ebrada. Si Ebrada giimbitar sa kapolisan tungod niini apan mihimakak sa kalambigitan sa kamatayon sa iyang agalon.

Nagtuo ang kapolisan nga gigamitan og icepick o ba kaha screw driver sa kriminal ang pagpatay sa biktima. - Uban sa report ni Maricel Regasajo (BANAT NEWS)