Bukog nangabali sa disgrasya

CEBU, Philippines - Nabali-bali ang kabukogan sa duha ka tawo dihang ang motorsiklo nga ilang giluwanan gisungag sa usa ka sakyanan sa dalan P. Basubas ug M.C. Briones sa barangay Tipolo, dakbayan sa Mandaue sa miaging adlaw.

Ang biktima mao sila si Aloysius Japal Tago, 44 , ug Niel Anthony Roxas, 29 , nga pulos taga barangay Yati sa lungsod sa Liloan.

Si PO2 Ruben Serdena, imbestigador sa traffic division sa Mandaue City Police Office (MCPO) miingon nga nagpaingon si Tago ug si Roxas sa dakbayan sa Sugbo gikan sa amihanan nga nagsakay og motorsiklo.

Apan sa pag-abot nila sa eskina P. Basubas ug MC Briones kalit lang silang gisungag sa usa ka sakyanan nga gimaneho ni Felix Guisadio, 54 , nga taga Basak, dakbayan sa Mandaue.

Matud pa ni PO2 Serdena nga gumikan sa kakusog nga pagkadasmag, nalamba ang motorsiklo nga giluwanan sa mga biktima nga maoy hinungdan sa ilang pagkaangol.

Dali nga gidala sa Mandaue City District Hospital ang mga biktima apan human sa pasiunang paghiling niini sa mga doktor gibalhin kini ngadto sa tambalanan sa dakbayan sa Sugbo.

Dugang pa ni PO2 Serdena nga si Guisadio kinsa mitahan sa ilang buhatan giditiner   na karon sa ilang buhatan alang sa tukmang lakang nga ilang pagahimoon. (BANAT NEWS)