Bucao nasubo kay Shrine nagusbat

CEBU, Philippines - Si Vice Mayor Alan Bucao sa dakbayan sa Talisay mipadayag og kasubo sa kapakyas sa dakbayan sa pagpaayo sa land mark sa American Landing tungod kay wala nay pundo ang dakbayan alang niini.

Kini samtang saulogon karong Marso 26, 2011 sa dakbayan sa Talisay ang    ika-66 nga   American Landing.

Matud pa ni Bucao nga angayan na gayud untang ipaayo ang mga estatuwa sa mga sundawong Amerikanhon nga midunggo ug misubay sa baybayon sa Talisay kay sa pagkakaron nangagusbat na.

Hinuon miingon si Bucao nga personal niyang susihon ang maong shrine uban sa tuinugyanan sa enhineriya sa siyudad aron makita nila kun unsay unahon sa pagpaayo niini aron nga sa dili pa moabot ang Marso 26, andam na ang tanan.

Napanid-an sa daghang Talisaynon nga nangagusbat na ang mga estatuwa busa matud pa ni Bucao nga naglaraw siya nga kinahanglang ilisdan ang mga dapat niini ug mga materyales nga dili tay-on aron nga magpabilin ang kalig-on ug katahom niini hangtod sa hangtod.

Apan matud pa sa bise mayor nga kinahanglang destinohan niya kini og tourism officer aron maoy moatiman niining maong shrine kay kining butanga ubos kini sa tourism office sa dakbayan.

Ang lakang ni Bucao may labot sa nabaniog na kaayong komentaryo sa taga Talisay   gumikan sa nasud-ong nila nga ang mga puthaw nga koral sa palibot sa mga estatuwa nga nangaputol na tungod kay gikaon na sa taya, samtang ang pintal sa sawog niini nangalap-ak-lap-ak ug nangatangtang na kay gipasagdan lang sa kagamhanan.

Ang mga kapolisan nagkanayon nga sa duol sa nahimutangan sa mga estatuwa nagpasad ang bas nga gikabya sa dagkong bawod sa dagat apan ang ubang bas gikan sa mga mangaligo sa dagat nga mosaka ngadto sa ibabaw sa landing mark kay gihimo na nila kining diving board.

Ang kapolisan nagkanayon nga wala na kini bantayi karon sa Civil Security Unit (CSU) busa ang basura sa dagat anaa na magpundo sa palibot sa maong shrine.

Kahinumdoman nga si Kongresista Eduardo Gullas kinsa migahin og budget sa maong proyekto nasagmuyo kaniadto tungod kay ang mga estatuwa nga gipabarog sama lang kini sa mga manikin   nga nagtikig lang ug naggahi.

Busa matud pa ni Bucao nga tukoron sa kagamhanan sa dakbayan ang tourism office aron ang piyado ning maong buhatan maoy tahasan sa pag-atiman sa katahom sa maong shrine. (BANAT NEWS)