PNP full alert sa Sinulog

CEBU, Philippines - Ideklarar sa kapulisan nga full alert status ang kapulisan sa tibuok rehiyon sa dili pa sa adlaw na gyud sa Sinulog Mardi Gras dinhi sa dakbayan nga ipahigayon karung sunod semana.

Lakip sa buot ipatuman ang pagkanselar sa mga lisensya sa armas niadtong mga sibilyang nanag-iya niini.

Kini ang giluwatang pamahayag ni Sr. Supt. Louie Oppus Deputy Regional Director for Operation (DRDO) sa Police Regional Office-7 atol sa pakighinabi niini sa mga tigbalita kagahapon subay sa rekomendasyon sa city director sa kapulisan sa dakbayan Sr. Supt. Melvin Ramon Buenafe.

Si Oppus nagkanayon nga mihangyo kanila si Buenafe nga temporaryong kanselahon kadtong mga gun holders ug ang pagpang-isyu ngadto sa mga indibidwal og Permit to Carry Firearms Outside Residence karung sunod semana sama usab sa ilang gihimo sa miaging Sinulog aron masigurong walay makadala og armas atol sa maong dakong kalihokan dinhi sa siyudad sa Sugbu.

Apan giklaro ni Oppus nga iyaha pang paabuton ang rekomendasyon ni Buenafe ug karung Biyernes ipahigayon nila ang final nga tigom alang sa ilang pagpangandam sa seguridad sa Sinulog Mardi Gras.

Gipahibawo usab niini nga mangayo sila og augmentation gikan sa Central Command aron maoy moabag sa kapulisan pagpatunhay sa kahusay’g kalinaw atol sa Sinulog.

Matud ni Oppus dili lang ang kapulisan maoy tahasan sa pagbantay ug pagpatunhay sa kahusay’g kalinaw sa dakbayan kundili lakip na niini ang komunidad diin may dakong papel pagpaniid sa ilang tagsa-tagsa ka lugar.

Bantayan usab og maayo ang tanang vital installations, pantalan, airports ug uban pang exit points aron masigurong walay makalusot nga dautang elemento nga planong momugna og kasamok atol sa maong adlaw.

Sa iyang bahin si Sr. Supt. Erson Digal, hepe sa kapulisan sa probinsya nipahibawo usab kagahapon nga duna siya’y gitaganang puwersa sa dakbayan karung sunod semana ug mopahigayon usab og checkpoint ang matag lungsod. (BANAT NEWS)