CENTCOM, PRO7 misusi sa report nga may ASG sa bohol

CEBU, Philippines - Nautingkay ang Bohol Provincial Police Office ingon man ang kasundalohan sa maong lalawigan gumikan sa mikatap nga report kabahin sa presensya sa mga gituohang mga sakop sa teroristang Abu Sayyaf sa ilang dapit.

Si Lieutenant Colonel Romeo Brawner, Commanding Officer, 2nd Special Force Battalion, Philippine Army sa probinsiya sa Bohol nga gikahinabi sa Banat News sa telepono mibutyag nga duna sila’y nadawat nga report gikan sa Zamboanga nga dunay lima ka tawo nga gipangulohan sa usa ka Doktor Abu ang misakay og dual engine boat gikan sa Zamboanga paingon sa Kabisay-an.

Apan giklaro niyang ‘unverified’ pa kini. Giingong adunay target ang grupo nga posible nilang dagiton apan matud ni Brawner nga wala sila kahibalo kung si kinsa.

Ang militar sa Bohol wala’y nadawat usab nga report nga dunay mga bag-ong mga tawo ang miabot diha sa lugar nga madudahan ang mga lihok. Gibutyag ni Brawner nga niadtong Lunes sa hapon ang gobernador sa probinsiya sa Bohol nagpatawag og emergency meeting tali sa Philippine Navy, Philippine Special Force , Philippine Coastguard ug sa local nga kagamhanan.

Niadtong Lunes ang Philippine Navy, Philippine Army ug kapolisan nagpadala og mga sakop nga magpatrolya diha sa kadagatan sa tibuok probinsiya sa Bohol.

Ang tanang mga nanag-iya og mga beach resort sa probinsiya sa Bohol gihatagan na usab og mga pahimangno nga magmabinantayon sa kanunay. Ang mga mayor sa kalungsuran sa probinsiya gipahibawo na usab kabahin sa maong report aron usab sila maalerto. Sa pakighinabi sa Banat News sa Provincial Director sa Bohol Police Sr. Supt. Constantino Barot Jr. kini mibutyag nga nakadawat usab sila og impormasyon kalabot sa presensya sa mga Abu Sayyaf sa Bohol.

Sumala pa sa impormasyong nadawat sa Banat News gikan sa kasaligang tinubdan sa maong lalawigan nga adunay tulo ka speedboats nga gituohang iya sa mga Abu Sayyaf nga miabot.

Ang Bohol adunay daghang mga beach resorts nga bakasyunan sa mga turistang langyaw ug lokal gikan sa nagkadaiyang lugar.

Apan giklaro ni Barot nga tabi-tabi pa ang ilang nadawat ug dili pa kini kompirmado apan aduna na sila’y gihimong pakisusi niini ug gipakatap na ang iyang mga sakop pag-verify sa report.   

Samtang sa bahin usab ni Sr. Supt. Agusto Marquez, ang hepe sa Regional Intelligence Division (RID) mibutyag nga bisan wala pa makumpirmar wala nila kini igsapayan ug ilaha na kining gisusi.

“We have no confirmation pero di namo ni i-set aside. Kay layo man gani ‘tong Dos Palmas naabot sila didto dinhi pa,” matud pang Marquez. Kahinumduman ang ASG miadto sa Dos Palmas sa Palawan ug nanagit og mga langyaw’ng turista ug gidala sa Basilan. Pipila kanila ang gipatay sulod sa pipila ka bulang pagka-hostage.

Matud pang Marquez nga kaniadto pamang kanunay nga adunay hulga sa terorismo ang Kabisay-an ug dili na bag-on, ang susamang mga nanggawas nga balita nga iyang gihulagway nga posibleng gikan sa mga ‘alarmist’ nga mga tawo. (BANAT NEWS)