CEBU, Philippines - Pormal nga milingkod kagahapon ang bag-ong officer-in-charge sa Cebu City Medical Center nga si Dr. Eduardo Sedoripa.
Nasayran nga mikabat gyud og pipila ka buwan ang pagpangita ni Mayor Michael Rama og tawo nga modumala sa operasyon sa CCMC ug maoy mohulip ni Dr. Myrna Go.
Giangkon ni Go sa pakighinabi sa Banat News kagahapon nga taud-taud na siyang gustong mobiya sa iyang puwesto apan nalangan lang kini gumikan kay nangita pa og tawong makahulip kaniya.
Dugang pa niya nga usa siya sa mitabang aron mangita og tawo nga maoy modumala sa CCMC.
Sumala pa ni Go nga kinahanglan niya nga atimanon ang iyang bana nga dunay sakit ug gitambagan usab siya sa iyang anak nga mobiya na isip hepe sa CCMC aron dili maapektohan ang dagan sa iyang blood pressure.
Hinuon magpabilin gihapon nga moalagad si Go sa CCMC gumikan kay motabang gihapon kini sa operasyon sa maong tambalanan.
Samtang gipadayag ni Rama nga usa sa mensahe niya sa bag-ong nangulo sa CCMC mao ang hapsay nga pagpadagan niini.
Dako hinuon ang pagsalig ni Rama kang Sedoripa gumikan kay ang Department of Health mismo ang nag-rekomendar niini ngadto sa iyang buhatan.
Sumala pa sa mayor nga mi-serbisyo na si Sedoripa og pipila katuigan didto sa Munisipyo sa Boljoon ug iyang nasuta nga limpiyo ang rekord niini busa wala siya magduha-duha nga himuon kini nga hepe sa CCMC.
Kahinumduman nga taud-taud na nga nangita ang siyudad nga maoy modumala sa CCMC apan dunay uban nga gitanyagan ang mibalibad. (BANAT NEWS)