Bana naghikog sa problema

CEBU, Philippines - Patay nga napalgan ang usa ka tawo sa sulod sa ilang kusina kinsa gituohang naghikog pinaagi sa paghigot og pisi sa iyang liog sa barangay Togonon, dakbayan sa Danao sa miaging kaadlawon.

Ang namatay mao si Vicente Lawas Cananse, 43, nga nagpuyo sa maong lugar kinsa nadiskubrehan sa iyang asawa nga si Pacita Bueno Camanse.

Si PO3 Pedro Borinaga sa kapolisan sa maong dakbayan nga nahinabi sa Banat News miingon nga si Pacita nga ilang gisukitsukit miingon nga naghambin og bug-at nga personal nga problema ang iyang bana nga malagmit maoy hinungdan sa pagpakamatay niini.

Hinuon si PO3 Mendoza miingon nga sa crime scene wala sila makakaplag og suicide note isip ebidensiya gawas lamang sa pisi nga nylon nga maoy gigamit sa paghikog pinaagi sa paghigot niini sa liog ug ang pikas tumoy didto igaid sa sagbayan sa kusina sa ilang balay.

Matud pa ni PO3 Mendoza nga ilang gisugyot ngadto sa pamilya ang pagpa-autopsy sa patay’ng lawas sa namatay alang sa pagsuta kun may foul play ba o wala ang kamatayon niini.

Ang asawa wala usab motug-an sa kapolisan unsang matang ang sakit nga gihambin sa namatay nga maoy gidudahang hinungdan sa paghikog niini. (BANAT NEWS)