CEBU, Philippines - Pulos samdan ang duha ka batan-ong lalaki nga gipanunggab sa ilang gikainom didto sa barangay Poblacion, dakbayan sa Lapulapu sa miaging gabii.
Ang biktima mao sila si Joseph Pinote, 21, ug Leomar Pitaluna, 27, nga pulos molupyo sa maong dapit, samtang ang suspetsado mao si Jomar Castillon nga taga sitio Langob, barangay Poblacion sa maong dakbayan.
Si PO3 Dioscoro Arong sa homicide section sa kapolisan sa maong dakbayan miingon nga nag-inom ang suspetsado ug ang duha ka biktima dihang kalit lang nga nagkalalis.
Dugang pa niya nga sa dihang miinit gumikan kay nangalasbag na, misangpot sa pagsinumbagay, ug dihang gilupig ang suspetsado sa duha niya ka kauban sa inom, nakahukom siya sa paggamit sa iyang kutsilyo.
Dihadiha human niya malanit ang kutsilyo nga iyang gitangkil, gipangluba dayon niya ang duha niya ka kontra sa sinumbagay.
Matud pa sa mga nakasaksi nga ang duha ka biktima kinsa walay kabangkaagan sa duwa nga dinunggabay pulos samdan ang mga kalawasan.
Gihatud dayon sila ngadto sa Lapulapu District Hospital apan human sa pasiunang pagtambal dali kining gibalhin sa Vicente Sotto Memorial Medical Center sa dakbayan sa Sugbo.
Ang suspetsado kinsa dali nga nakasibat pahilayo sa maong dapit padayon pang gipangita karon sa kapolisan. (BANAT NEWS)