CEBU, Philippines - Midemanda karun ang mayor sa lungsod sa Medellin og public apology ngadto sa direktor sa kapolisan sa lalawigan sa Sugbo nga si Sr. Supt. Erson Digal tungod sa giingong pagpasagad lang og pamasangil sa direktor kaniya may labot sa kamatayon sa iyang kawani.
Sa gipadala nga press statement ni Medellin Mayor Ricardo Ramirez buot niyang papangayuon og public apology si Digal kung dili kini buot nga ikiha. “He (Ramirez) is demanding for Digal to apologized in public or face a barrage of cases and avoid the withdrawal of a municipality’s logistical support to the local PNP,” matud pa sa press release nga gi-email diha sa The Freeman, igsuong pamantalaan sa Banat News. “They say hell hath no furry like a woman scorned, I say hell hath no fury like a mayor maligned,” pasabot pa sa mayor human giingong gipahibalo ni Digal nga siya maoy principal suspect sa kamatayon ni Edliberto Abao.
Samtang gisaway usab ni Ramirez ang pagpadala og imbestigador gikan sa Criminal Investigation and Detection Group kinsa paryente sa gipalagpot ni Ramirez nga opisyal sa Land Transportation Office sa Medellin tungod sa mga giingong anomalya.
Dugang pa niini nga si Angelito Yaun kaliwat usab sa kontrobersyal nga kapitan nga si Marianito Yaun.
Samtang diha sa press statement gisaway usab ang giingong witness nga gihuptan karun sa kapolisan.
Butyag pa niini nga mipadala ang witness og text message ngadto sa pamilya ni Abao aron sila kombinsiron nga moisyu og statement batok sa mayor kini tungod kay adunay milyones niini nga nagtangag.
Nasayran usab sa kampo sa mayor nga ang hinungdan sa kamatayon ni Abao mao ang sakit sa diabetes ug hypertension. Si Abao giingong adunay samad pinusilan sa paa ug namatay diha sa tambalanan.
Gikwestyon usab ni Ramirez ang pagbalhin ni Digal sa hepe sa kapolisan sa Medellin nga si Sr. Insp. Bonifacio Arriesgado nga walay koordinasyon ngadto kaniya isip local chief executive. Sa pakighinabi sa Banat News ni Digal mibutyag kini ang CIDG na ang nagkupot sa maong kaso. “As law enforcers we do our part to investigate”pasabot pa ni Digal. - BANAT NEWS