Dalaga gipusil sa silingan

CEBU, Philippines - Samdan ang usa ka 20-anyos nga dalaga human kini pusila sa iyang silingan sa sitio Kapotatan sa barangay Ginaacot, dakbayan sa Danao sa miaging Biyernes sa kaadlawon sa pagsugat sa bag-ong tuig. Ang biktima mao si Helen Argallon Capuyan, hingkod, samtang ang suspetsado mao si Francisco Solon, 50, minyo nga pulos taga Kapotatan.

Si PO2 Marlon Remullo sa Danao Police Station nga nahinabi sa Banat News miingon nga gikan pa ang biktima sa internetan nga nahimutang usab sa maong dapit, ug dihang misulod na kini sa ilang balay kalit lamang kining gipusil sa suspetsado.

Human sa maong pagpamusil ang suspetsado dali usab nga nakapahilayo sa maong dapit , ug wala na siya hiabti sa kapolisan nga mao untay modakop kaniya.

Ang biktima kinsa nasabak sa dughan gihatod dayon ngadto sa Danao District Hospital apan human sa pasiunang pagtambal sa mga doktor sa maong tambalanan dali kining gibalhin sa Vicente Sotto Memorial Medical Center sa dakbayan sa Sugbo.

Si PO2 Remullo miingon nga dili matataw sa kapolisan ang hinungdan sa maong pagpamusil sa suspetsado ngadto sa biktima sanglit wala usab sila magkaaway niini.

Hinuon si PO2 Remulla miingon nga kun dili tinuyo sa suspetsado ang pagpusil sa maong biktima dako ang posibilidad nga naigo lamang kini sa saag nga bala. - BANAT NEWS