Akhro nangluba gipangita

CEBU, Philippines - Gipangita pa sa kapolisan ang usa ka sakop sa (Alpha Kappa Rho) Akhro kinsa gisuspetsahang miluba angol sa   usa ka 32-anyos nga lalaki didto sa barangay Looc, dakbayan sa Mandaue niadtong Biyernes sa gabii sa pagsugat sa bag-ong tuig. Ang biktima mao si Wilfredo Militar, 32, minyo nga nagpuyo sa maong dapit samtang ang suspetsado nailhan lang sa angga nga Panoy nga silingan sa biktima.

Sa imbestigasyon nga gihimo nila ni Inspector Wilson Abot sa Presinto 5 sa Opao Police Station nasuta nga ang biktima ug suspetsado uban sa ilang pipila ka mga higala, nag-inom. Unya dihang nangalasbag na, giingong nagkalalis ang biktima ug ang suspetsado hangtod nga nahutdan na sa pailob ang suspetsado.

Gumikan kay ang suspetsado may gitangkil man nga kutsilyo walay pupanaganang miluba sa biktima.

Ang biktima   dali nga gidala ngadto sa Mandaue City District Hospital apan human sa pasiunang pagtambal dali kining gibalhin ngadto sa Vicente Sotto Memorial Medical Center sa dakbayan sa Sugbo.

Ang suspetsado kinsa dali nga nakasibat pahilayo sa maong lugar padayon pa nga gipangita ug gisuta usab ang tinuod nga pangalan ug bansagon niini. - BANAT NEWS