Gwen miduaw sa shrine sa Lindogon

CEBU, Philippines - Miduaw na usab si Gobernador Gwendolyn Garcia sa nabaniog na kaayong Birhen sa Marian Monks of the Eucharistic Adoration o naila kaayo nga Lindogon shrine sa wala pa siya molarga ngadto sa Estados Unidos. Dala sa gobernador ang mga pinaskohan alang sa mga monghang kaparian nga nagdumala sa maong shrine.

Kauban   niya sila si Mayor Lionel Bacaltos sa Sibonga ug ang runningmate sa gobernadora sa May 2010 nga eleksyon nga si vice guvernatorial candidate Glenn Soco. Si Garcia miluhod gyud atubangan sa balaanng imahen ni Birhen Maria sama sa ubang mga yanong magtutuo ug deboto sa Mahal nga Birhen silang duha si Soco kay nangayo og bendisyon sa birhen alang sa ilang maayong kaugmaon.

Human sa pag-ampo, si Garcia milibot ug mitan-aw sa bag-ong lawak sa Lindogon Shrine nga gibutangan sa nagkadaiyang imahen sa mahal nga Birhen Maria ug nanagkot sa kandila.

Samtang gitunol usab sa gobernadora ang iyang gasa ngadto sa mga monghe sa naasoy nga shrine nga gilangkoban sa wala matinong cash gift gikan sa iyang kaugalingong bulsa, sinakong bugas ug ingon man mga prutas.

Human niya kini ihatag sa gobernadora, usa sa mga madre sa nahisgutang shrine, personal usab nga mitunol sa ilang pinaskohan ngadto kang sa gobernador kinsa mihangop pag-ayo sa maong gasa  gikan sa mga madre.

Ang gobernadora nakigkulokabildo usab sa mga debotos sa mahal nga Birhen sa Lindogon nga mibisita usab sa maong lugar aron sa pag-ampo.

Gani nagpahulagway pa ang gobernador uban sa mga tigulang na mga magtiayon sama nila ni Lolo Juanito ug Lola Elena Lavador.

Lakip nga gihimamat sa goberandor mao ang usa ka bata nga mikuyog sa iyang inahan nga nag-wheelchair.

Ang Lindogon maoy usa sa mga simbahan nga dili makalimtan sa gobernadora sa pagbisita matag tuig sanglit natawo siya dungan sa kapistahan sa Patron sa Sibonga nga mao ang Our Lady of Pilar.

Human sa maong pagbisita sa Lindogon shrine, ang gobernador mideretso na sa Mactan Cebu International Airport alang sa iyang biyahe sa US. (BANAT)