Trak misampak sa kooperatiba duha patay, 2 angol

CEBU, Philippines - Duha ang patay diha-diha dayon ug duha usab ang naangol sa nahitabong aksidente sa kadalanan human mibangga ang usa ka Isuzu Elf ngadto sa usa ka opisina sa kooperatiba sa miaging hapon sa barangay Tugas sa lungsod sa Madridejos, isla sa Bantayan.

Ang namatay mao si Zaira Santillan, 2, ug Jessel Buenavista 25, dalaga, nga taga barangay Ticad sa lungsod sa Bantayan samtang ang nangaangol ug nakaangkon og grabeng bun-og ug samad sa kalawasan mao sila si Maria Gina Cueva, 35, ug Michelle Boltron, 15, pulos taga Tugas.

Si PO2 Victor Avenido sa Madridejos Police Station mitug-an nga usa ka Pablo Bidas maoy drayber sa Isuzu Elf nga gikan naghatud og mga prutas sa lungsod sa Madredijos ug padulong na kining mopauli sa Bantayan.

Si Bidas mitug-an nga samtang sila nagdagan kalit lang milabang ang 2-anyos hinungdan nga iyahang gisuwayan paglihay ang bata apan naigo gyud kini sa luyong ligid hinungdan nga namatay dihadiha ang biktima.

Si Buenavista kuyog ni Bidas, naglingkod sa front seat namatay sab human gibangga sa drayber ngadto sa kongkreto nga bongbong sa opisina sa Dunggoan Cooperative dihang nawad-an kini og kontrol sa manobela.

Si Cueva nga nananom niadtong higayona duol sa iyang panimalay naigo sab sa trak dekarga samtang si Boltron nga nagpa-load sa iyang cellphone niadtong higayona naigo usab sa maong trak. Sila si Cueva ug Boltron daling gidala sa Bantayan District Hospital apan tungod sa ilang kahimtang gi-refer sa doktor sa Vicente Sotto Memorial Hospital dinhi sa dakbayan sa Sugbu.

Samtang si Bidas temporaryong gibalhog sa detention cell sa kapulisan sa Madridejos human bulontaryong mitahan sa iyang kaugalingon. (BANAT)