15 nagkalibanga

CEBU, Philippines - Mikabat na sa kinse ka tawo ang nasakit og diarrhea sa lungsod sa Catmon sa barangay Makaat kini human kagahapong adlawa adunay nahidangat sa Sogod District Hospital nga duha ka bata human usab kini maigo sa maong sakit.

Sa pakisusi sa Banat News sa Sogod District Hospital kagahapong adlawa, usa sa mga trabahante nga nagpaila lang nga Tatz ang mibutyag nga adunay nadugang nga upat ka bata ang gidala sa maong tambalanan tungod sa diarrhea.

Samtang sa pakighinabi sa Banat News ni Rennan Cimafranca ang regional epidemiologist sa Department of Health (DOH-7) mibutyag kini nga bisan paman og aduna nay usa ka tigulang nga babaye nga namatay ang uban sa nasakit niini naa na sa maayong kahimtang.

Gipahigayon usab ang swab test, water test ug uban pang laboratory test pagtino asa gikan ang maong kagaw samtang gihimo na ang barangay assembly alang sa pagtudlo sa mga tawo sa unsay buhaton aron malikayan ang maong sakit.

Mipasabot si Cimafranca nga kasagaran sa mga taptan og diarrhea mao ang mga hinay og resistensya.

Ang lungsod sa Catmon maoy ikatulong lungsod nga naigo sa water borne illness diin usa sa mga lungsod gipaubos sa typhoid outbreak sa brgy Poblacion ug Sta. Filomena sa lungsod sa Alegria ug diarrhea usab sa Danao City. (BANAT)