Gisungag sa taxi

CEBU, Philippines - Patay ang usa ka tigulang babaye sulod sa tambalanan human kini gidasmagan sa naghaguros nga taxi samtang kini milabang sa karsada sa miaging alas-10 sa gabii diha sa dalan Escario sa barangay Camputhaw, siyudad sa Sugbu.

Ang biktima nga nalandig sa tambalanan giila nga mao si Ceferina Cuering, 68, taga Purok 8 sa barangay Camputhaw samtang ang drayber sa taxi nga nakadasmag giila nga si Ulysses Comaingking, taga barangay San Roque, sa lungsod sa Sogod nagmaneho sa Eag Taxi nga nagtangag sa plakang GXB-684.

Si SPO1 Porferio Lim Jr., sa traffic division sa Cebu City Police Office nga nahinabi sa Banat News sa telepono mibutyag nga subay sa gitug-an sa anak sa biktima kaniya gikan mitambong og kalihokan sa Capitol Parish ang biktima.

Matud ni Lim padulong na pauli ang biktima ug milabang sa karsada, samtang si Comaingking gikan sa Juana Osmeña subay sa dalan Escario padulong maghatud sa iyang pasahero ngadto sa I.T. Park sa Lahug. Apan pag-abot diha sa tungod sa simbahan iyang nadasmagan ang biktima hinungdan nga maayong pagkabunal sa ulo niini sa aspaltadong karsada. Matud ni Lim nga si Comaingking mialegar nga iyang nabantayan ang biktima nga milabang sa karsada ug kalit lang milingi human gitawag sa iyang kauban. Nagdahom si Comaingking nga mobalik kini sa agi ang biktima apan milahos hinuon kini og labang hinungdan nga nagduhaduha pagtunob sa brake ug nadasmagan ang biktima.

Si Cuering nakaangkon og grabeng bun-og sa kalawasan ingon man samad sa ulo ang gidali paghatud sa Cebu City Medical Center (CCMC). Matud ni Lim iyang gitawgan ang CCMC kagahapon sa kaadlawon aron kumustahon ang kahimtang sa biktima apan gideklarar sa doktor nga nakabsan sa kinabuhi nianang alas 2:45 sa kaadlawon.

Si Comaingking boluntaryong mitahan sa iyang kaugalingon ug kasamtangang gibalhog sa detention cell sa Traffic Division samtang gipaabot nga mopasaka og tukmang kaso ang tagtungod sa biktima. – BANAT NEWS