Bugasan sa kababayen-an gitukod
CEBU, Philippines - Laing gisudlan ni Gobernador Gwendolyn Garcia nga Memorandum of Agreement (MOA) mao ang tali sa kagamhanan sa lalawigan ug sa Provincial Women Association alang sa katukoran sa Bugasan sa Kababayen-an.
Kini aron may kahigayonan ang grupo sa mga kababayen-an nga makaabag sa ilang mga kabanahan.
Sa paglusad sa bugasan sa kababayen-an, gitumbok sa gobernadora nga ang iyang administrasyon dako og tinguha nga makatabang sa mga kababayen-an hinungdan nga buot siyang makapangita og laing panginabuhian ang mga asawa.
Tag 10 ka sakong bugas maoy unang ihatag sa Kapitolyo alang sa matag usa sa grupo nga makapaninda og bugas.
Unang gilusad ang Bugasan sa Kababayen-an sa 9 ka lungsod nga gilangkoban sa Carcar, Barili, Dumanhug, Moalboal, Borbon, San Remegio, Alegria, Sibonga ug Tabuelan.
Usa sa misaksi sa maong kasabotan mao si provincial board member Agnes Magpale, ang chairman sa Committee on Women, Family and Minors, kinsa mipasabut nga ang gobernadora sa lalawigan sa Sugbo may daghan pang tabang nga mapaabot sa mga babaye. (BANAT)
- Latest
- Trending
