Biyahe sa Cebu Pacific nalangay

CEBU, Philippines - Nalangay og pipila ka takna ang usa ka biyahe sa Cebu Pacific human makasinati og technical problem sa dayon niining larga paingon sa Manila kagahapon.

Ang Cebu Pacific Domestic Flight 5J 560 gikatahong naka-schedule nga mobiya unta sa alas 6:00 sa buntag apan nabantayan sa piloto   ang problema sa makina sa maong abyon. Hinungdan nga gimandoan dayon niini ang tanang pasahero sa pagbalhin nalang sa laing flight aron makalikay sa mga posibleng disgrasya unya sa biyahe.

Busa ang 142 ka pasahero nakadesider sa pagbalhin sa laing biyahe diin  19 didto mosakay sa 5J 550 nga flight samtang ang 17 didto mosakay   sa 5J 562 ug ang ubang pasahero nakahukom nga sa sunod adlaw nalang molarga.

Samtang si Mactan-Cebu International Airport Authority (MCIAA) General Manager Paul Villarete mibutyag nga ang tanang pasahero walay angayan nga kabalak-an tungod kay gamay lang ang nahitabong technical problem.

Mihangyo usab si Villarete sa publiko nga dili magpadala og mga text message nga binuang aron dili makahatag og kahadlok sa mga pasahero.

Kini human hisayri nga mikatap ang mga text message nga matud pa nasunog ang usa ka eroplano sa Cebu Pacific.

Matud pa ni Villarete nga padayong gimonitor ang tanang flight sa abyon sa ilang buhatan bisan pa man ma- international o domestic nga biyahe ilabi na karong holiday season.

Sa official statement sa tagdumala sa Cebu Pacific Airline kini nagbutyag nga ila ra usab nga natagad dayun ang mga pasahero og gani ila pa kini nga gihatagan og mga pagkaon.

“Cebu Pacific flight 5J 560 from Cebu to Manila has been cancelled due to an aircraft situation. Guests on this flight had already been accommodated on succeeding flights and provided with meals. The airline apologized to its passengers for the inconvenience,” segun sa opisyal nga pamahayag sa Cebu Pacific Airline. - BANAT NEWS