Mga tindaha'g pabuto gironda

CEBU, Philippines - Laing kinalit nga pagpangronda na usab ang gilusad sa mga sakop sa Task Force Pabuto kagahapon sa nagkadaiyang establisamento sa Carbon Market ug dalan Manalili batok sa mga tindahang namaligya og pabuto.

Sumala pa ni Racquel Arce, hepe sa maong task force nga mibalor na og P800,000   ang mga pabuto nga ilang nasakmit gikan niadtong Disyembre 24 hangtod kagahapon.

Matud pa ni Arce nga ipadayon   nila ang kampanya hangtod sa bag-ong tuig aron masiguro nga hawan ang mga tindahan sa mga baligyang pabuto.

Dugang pa niya nga adunay mga tawo ang manawag kaniya aron itudlo ang mga tindahan nga namaligya og pabuto   ug mao kini himoan dayon nila og dinaliang aksyon.

Aminado hinuon si Arce nga adunay ubang tindahan nga dali kaayong makapanipig sa ilang mga baligya nga pabuto kung makabantay nga nagpadulong na ang mga sakop sa Task Force Pabuto.

Ang mga nasakmit nga pabuto gihumol dayon sa tubig   kagahapon atubangan sa buhatan sa city market authority buwahan di magamit.

“Kadtong nagtago-tago og baligya og pabuto, pasensiyaay lang ta kay magpadayon pa gyud ang among hingpit nga operasyon. Trabaho raman gud ni ato, hinaut nga motuman na lang gyud unta sila sa balaod,” nagkanayon si Arce.

Suma pa ni Arce nga kasagaran sa mga tindahan nga ilang nasakmitan og pabuto, iya sa mga Insek.

Mitambayayong usab sa kampanya batok sa pabuto ang Cebu City Police Office ug Bureau of Fire Protection. - BANAT NEWS