Bombero andam na para New Year ug Sinulog

CEBU, Philippines - Hingpit na ang pagpangandam sa kabomberohan ning dakbayan sa Sugbo alang sa pagsugat sa Bag-ong Tuig, sumala pa ni Cebu City Fire Marshal Aderson Comar kagahapon.

Matud pa ni Comar nga gawas sa Bag-ong Tuig, gipangandaman usab nilang daan ang umaabot nga Sinulog nga hugopan usab sa kaliboan ka katawhan nga mosaksi niini. 

Sumala pa niya nga sukad npa niadtong Disyembre 15, gisuspenso niya ang pagsang-at og leave sa iyang mga sakop ug moepekto kini hangtud sa Enero 15 sunod tuig.

      Dugang pa ni Comar nga sa pagsugat sa Bag-ong Tuig adunay usa ka fire truck nga mag-roving ug ang uban niini naka-standby usab sa ilang fire station aron dali nga makaresponde kun dunay alarma sa sunog. Gawas sa Cebu City Fire Department, adunay siyam ka fire substation ang dakbayan ug kini nahimutang sa Labangon, Pahina Central, Pari-an, Pardo, Guadalupe, Lahug, Mabolo, Talamban ug San Nicolas. Dili pa lang dugay, gipahigayon ang random Operation Readiness Site Inspection sa nahisgutan nga mga   fire substation. Aminado hinuon si Comar nga sa gibuhat niya nga pakisusi, nagka-paspas ang preparasyon   sa mga fire fighter sa pagtubag og alarma. Ang mga preparasyon naglangkob sa pag-isa sa alarma, pagsul-ob sa ilang mga ginamiton sa dili pa sila mosakay sa fire truck ug paingon na ngadto sa fire scene.

      Sa pagka-karon, aduna na silay hustong mga gamit nga naglakip sa senina, helmet, coat ug fire fighting nga botas   ug 70 porsiyento kanila may delta uniform na.

Samtang giawhag ni Comar ang publiko nga magmabinantayon kanunay sa palibot aron malikayan ang sunog ilabi na sa panahon sa pagsugat sa Bag-ong Tuig diin kasagaran sa mga tawo mo-selebrar niini pinaagi sa pagduwa og pabuto. (BANAT NEWS)