Pusher nasikop sa buy-bust

CEBU, Philippines - Nabalhog sa bilanggoan ang usa ka tawo nga nadakpan sa kapolisan samtang namaligya og shabu sa dalan C.M. Enriquez sa barangay Suba, dakbayan sa Danao sa miaging hapon.

Ang nadakpan mao si Celso Frasco Banzon, 49, minyo nga nagpuyo sa maong dapit.

Si PO2 Marlon Remullo, sa Danao Police Station nga nahinabi sa Banat News miingon nga sa sayo pa nakadawat sila og taho kalabot sa illegal nga kalihokan sa maong suspetsado sa maong lugar.

Dugang pa niya nga si PO1 Friderick Gomez ug PO3 Bryan Batiquin sa Danao Police Station maoy naniid sa illegal nga kalihokan sa maong suspetsado sa maong dapit.

Dihang nasuta nga positibo ang tanan, gilusad dayon ang buy bust operation ug usa ka polis ang nagpakaaron ingnong buyer og shabu kinsa maoy mipalit konuhay og shabu nga gibayran sa minarkahang salapi.

Dungan sa pagtunol sa suspetsado sa shabu ngadto sa police decoy, giposasan dayon kini sa ubang mga polis.

Ang kalapasan sa Republic Act 9165 kon Comprehensive Dangerous Drugs Act of 2001 maoy kasong giandam sa kapolisan nga ipasaka sa korte batok sa maong dinakpan. (BANAT NEWS)