Hubog naligo namatay

CEBU, Philippines - Namatay ang usa ka tawo nga gituohang nalumos samtang naligo sa kadagatan sa sitio Lupa, sa barangay Punta Ingaño sa dakbayan sa Lapulapu sa miaging adlaw.

Ang namatay mao si Arnulfo Bacali Antiveros, 38, nga taga-barangay Gun-ob sa maong dakbayan.

Matud pa ni PO3 Arong nga nakainom og ilimnong makahubog si Antiveros ug mikuyog kini sa iyang mga pag-umangkon nga naligo sa Punta Ingaño.

Si PO3 Arong miingon nga pag-abot didto sa dagat, milukso dayon si Antiveros ngadto sa dagat ug mipatiurok kini ngadto sa ilawom sa dagat.

Apan nabalaka ang iyang mga kauban kay wala naman motunga   ug gipaabot nila og kapin usa ka oras, apan wala na gyud mopatim-aw si Antiveros. 

Dugang pa ni PO3 Arong nga namauli na lamang ang mga pag-umangkon ni Antiveros ug gipahibalo ang ilang mga kabanay   sa barangay Gun-ob.

Si PO3 Arong miingon nga human sa pipila ka oras napalgan sa mga kabanay nga milutaw na si Antiveros nga wala nay kinabuhi.

Giluba patay sa silingan

Namatay diha-diha ang usa ka ulitawo human kini dunggaba sa iyang silingan didto sa sitio Sangi sa barangay Pajo, dakbayan sa Lapulapu sa miaging gabii.

Ang biktima mao si Solimar Tajanlangit, 24, ulitawo, nga taga Sangi, samtang ang suspetsado mao usab si Donald Espinosa, hingkod, kinsa managsilingan sa lungsod sa Carcar.

Matud pa ni PO3 Arong nga si Tajanlangit ug Espinosa nagkabangi na miaging gabii didto sa maong dapit.

Unya human sa maong lalis, milakaw si Espinosa hinungdan nga miwaldas si   Tajanlangit nga nagpangita kang Espinosa.

Unya nakit-an niini ang biktima didto sa maong lugar nga kuyog sa usa ka higala niini nga nailhan lang sa angga nga Annie.

Sa dihang nagkita sila, walay daghang langas gihansakan dayon sa suspetsado sa iyang kutsilyo ang nagkalain-laing bahin sa lawas sa biktima busa gawas sa dughan, samdan usab ang ubang parte sa lawas sa biktima.

Dugang pa ni PO3 Arong nga dali nga gidala sa mga kabanay ang biktima ngadto sa Mactan Doctors Hospital apan gideklarar kini sa mga doktor nga dead on arrival.

Si PO3 Arong miingon nga ilang gisusi ang balay sa suspetsado sa hot pursuit operation nga ilang gihimo apan wala na nila igkita sa maong dapit ug padayon nila kining gipangita karon.  (BANAT NEWS)