CEBU, Philippines - Patay ang usa ka 23-anyos nga lalaki human aksidenteng mitipas ang gimaneho niining motorsiklo ug mibangga sa poste sa kuryente ug pagkahuman nakadasmag pa gyud og estambay diha sa barangay Inayagan lungsod sa Naga niadtong Domingo sa alas 5:00 sa buntag.
Ang biktima mao si Cesario Bejona Villahermosa, 23, taga barangay Kawayan lungsod sa Dalaguete samtang ang naangol nga mao si Adonis Labajo,21, molupyo sa maong lugar.
Matud ni PO1 Orlan Condes sa Naga Police Station dihang nahinabi sa Banat News ang biktima gikan sa lungsod sa Dalaguete paingon unta sa siyudad sa Sugbo.
Apan pag-abot sa maong lugar aksidenteng mitipas sa daplin ang motorsiklo ug mibangga sa poste, human niini misaliring ang motorsiklo ug nalahos ngadto kang Labajo tungod sa kakusog sa pagsampak niini.
Matud pa ni Condes nga ang mga nakasaksi nakakita sa pagkabuak sa helmet sa biktima dihang nasampak kini sa poste.
Daling gipanghatud ang mga biktima sa South General Hospital apan gideklarar nga dead on arrival si Villahermosa tungod sa kadaut sa ulo niini samtang luwas na sa peligro si Labajo.
Gituohan nga hubog o ba kaha nakatulog ang biktima samtang nagmaneho sa motorsiklo hinungdan nga wa dayun makabantay nga mitipas na kini sa agianan. (BANAT NEWS)