CEBU, Philippines - Nagsaulog sa Pasko sa sulod sa detention cell sa kapolisan sa Presinto 3 sa Basak Police Station ang usa ka tawo kinsa gidakop sa mga barangay tanod human gialigar nga nangumot og dughan sa 14-anyos nga dalagita alas-11 pasado ang takna sayo sa tungang gabii sa pagsugat sa Pasko.
Ang suspetsado nga nagtingkagol sa detention cell sa kapolisan mao si Lamichi Olitres, 35, taga barangay Tabok, dakbayan sa Mandaue.
Si Edgar Suico nga barangay tanod sa barangay Tabok ug ang amahan sa biktima maoy nagdala kang Olitres ngadto sa kapolisan human nila madakpi pagkahuman sa ginukdanay.
Sa imbestigasyon nga gihimo nila ni PO1 Melvin Pelayo, si Olitres hubog nga misaka sa panimalay ug misulod sa lawak sa biktima nga nag-inusarang natulog.
Matud pa nga gipawong sa suspek ang suga ug dayong duol sa gihigdaan sa biktima ug gipanghikap ang pribadong parte sa lawas niini hinungdan nga nahigmata kiini ug mikaratil sa pagdagan ug nagpaninggit pagpangayo’g panabang sa iyang ginikanan nga didto sa gawas sa ilang panimalay.
Ang suspetsado dali usab nga nakagawas sa panimalay ug mikaratil og dagan apan gitabangan og gukod sa mga silingan ug mga barangay tanod hangtud nga kini nadakpan. (BANAT NEWS)