Duguong Pasko 4 patay, 3 angol

CEBU, Philippines - Nahimong duguon ang pipila ka mga dapit sa Metro Cebu human sa mga pagpamusil ug pagpanunggab nga nahitabo sugod niadtong gabii sa Disyembre 23 hangtud kagahapon Disyembre 26.

Sa dakbayan sa Talisay, patay ang usa ka Restituto Villanueva, 50- human kini pusila sa uyo-an sa giingong iyang gikulata niadtong Sabado sa gabii atol sa adlaw sa Pasko diha sa Plainville 7th Street, barangay Bulacao, dakbayan sa Talisay.

Si Villanueva nakaangkon og duha ka samad pinusilan sa ulo wala na makaabot nga buhi ngadto sa Talisay City District Hospital samtang nadakpan ang suspek nga Ramil Hornada, human boluntaryong mitahan ngadto nila ni PO2 Roy Lofranco, PO2 Ray Ivan Juarez, PO1 Euwen Pitogo, PO1 Niño Parages ug PO1 Diosdado Namang.

Si Pitogo nga nahinabi sa Banat News kagahapon nagkanayon nga base sa ilang nahipos nga report si Villanueva giingong nakainom gikan nga mibisita sa iyang igsuon sa sitio Paglaum, barangay Bulacao, Talisay. Si Hornada uban nila ni Martin Bordaje, 27, ug Wilfredo Kuratsa, 27, nag-inom diha sa daplin sa karsada dihang giingong nalabyan sa biktima ug sa walay igong hinungdan gikulata niini (biktima) si Kuratsa ug pagkahuman si Hornada, apan ang naulahi (Hornada) kinsa adunay giluklok nga armas kalit nga mipusil kang Villanueva sa ulo. Si Hornada mitahan sa kapolisan human sa hitabo ug narekober sa mga polis ang kalibre .38 rebolber nga walay bala. (BANAT NEWS)