Missing nga Marine Watcher milutaw, may samad tinigbasan

CEBU, Philippines - Human sa tulo ka adlaw nga paghandom nga makauling buhi ug ilang makasalo sa Pasko ang sakop sa Cordova Marine Watch nga na-missing, nahugno kini human makit-i kagahapon sa buntag ang patay’ng lawas niini nga naglutaw sa dagat.

Ang patay’ng lawas ni Rudy Sultan napalgan sa grupo kagahapon sa alas 7:00 sa buntag sa gipadayong search and rescue operation sa Cordova Police ug Marine Watch sa tungatungang bahin sa Shell Island ug Parola sa barangay Day-as sa lungsod sa Cordova.

Si Sultan na-missing niadtong Lunes sa kaadlawon dihang kini misakay sa pumpboat sa duha ka mga dinakpang illegal fishers nga iya untang kuyogan padaplin sa baybayon apan wala na makadunggo ang maong panagatan lakip na si Sultan ug ang duha ka mananagat.

Padayong gipangita sa kapolisan ang mga suspek nga sila si Luis Fernandez ug Dongcoy Yongco nga taga barangay Pooc sa dakbayan sa Talisay nga pabiling nagtagotago. Si Supt. Henry Biñas miawhag na sa mga kabanay sa duha nga agnihon silang motahan sa ilang kaugalingon.Si Biñas midugang nga aduna nay record ang usa kanila diha sa Talisay police station apan wala niya kini ibutyag.

Samtang si SPO1 Henry Amores sa Cordova Police Station dihang nahinabi sa Banat News miingon nga ang grupo ni PO2 Charlie Valmoria maoy nakakaplag sa patay’ng lawas.

Si Valmoria gikatakda usab nga imbestigahon sanglit maisip nga siya maoy polis sa grupong midakop sa mga suspek uban si Sultan apan wala kini maniguro sa seguridad sa mga kaubanan base sa pagsusi sa nahitabo sa Provincial Investigation Branch sa Cebu City Provincial Police Office. Nasuta nga dunay duha ka samad sa bukobuko ang biktima nga gituohang inagian sa sundang ug gituohang gitigbas ug pagkahuman gitambog sa dagat si Sultan.

Si Mayor Adelino Sitoy sa iyang bahin namahayag nga hingusgan pa nila ang pagpatrolya sa kadagatan ug mokuyog na siya niini.

Dugang pa niini nga usa kini ka leksyon nilang mga taga Cordova ilabi na niadtong mga sakop sa Marine Watch aron dili mokompiyansa batok sa mga badlungon sa katilingban.

Samtang naglaraw karon si Chief Insp. Felix Pacaldo, hepe sa Cordova police station nga hangyuon ang lungsod nga palitan og armas ang mga magbalantay sa kinaiyahan tungod sa nahitabo. (BANAT NEWS)