Isda, karne gisakmit sa Task Force sa Kapitolyo

CEBU, Philippines - Mga isda ug karne nasakmit sa managlahing task forces sa lalawigan kagahapon sa kaadlawon ug Miyerkules sa   dakbayan sa Talisay ug sa Liloan.

Lima ka kahon nga isda nga giingong nakuha sa ilegal nga panagat ang nasakmit sa Cebu Provincial Anti-Illegal Fishing Task Force sa gihimo niining post-market denial operation sa lungsod sa Liloan niadtong Miyerkules sa gabii.

Ang nasakmit nga kinahong isda giingong gikan sa Masbate ug gidunggo sa pantalan sa lungsod sa Bogo aron unta itumod sa Pasil Fish Port sa dakbayan sa Sugbo.

Gibanabana nga mobalor og P12,250 ang mga isda nga nasakmit tungod kay nakita ni Nathaniel Lucero sa Bureau of Fisheries and Aquatic Resources 7 sa checkpoint sa barangay Cotcot, lungsod sa Liloan nga pinabuthan kini human nila susiha ang ginhawaan sa maong mga isda.

Upat ka kahon sa isda nga ‘Dalagang Bukid” ug Kitong ang positibong nasuta sa mga BFAR examiners nga kuha pinaagi sa dinamita. Ang operasyon kabahin na sa hugot nga kampanya ni Gob. Gwendolyn Garcia batok sa ilegal nga panagat sa tibouk lalawigan sa Sugbo.

Samtang sa dakbayan sa Talisay, sobra 100 ka kilong imported nga karne ang gisakmit diha sa merkado sa barangay Tabunok sa mga sakop sa Talisay City Veterinarian pinangulohan ni Dr. Santiago Hortel. Si Hortel nga nahinabi sa Banat News mibutyag nga pinasubay sa Executive Order 22 ni Gob.Gwendolyn Garcia ang maong operasyon. Ang maong mga karne gisakmit tungod kay walay freezers alang sa limpyong kabutangan niini diha sa maong merkado.

Nasuta nga ang maong mga karne dili mahimong ibutang lang og ice boxes nga matud pa niini daling mataptan og kagaw ug makasakit sa konsumidor. Gibana-banang moabot sa P5 mil ang balor sa maong mga karne nga giingong tag P100 matag kilo ang presyo. Sa milabay’ng mga semana P70 ngadto sa P80 lang ang kilo niini apan karong kapaskuhan mimahal kini. (BANAT NEWS)