CEBU, Philippines - Miabot na sa usa ka tonelada ang nasakmit nga imported nga karne dinhi sa lalawigan sumala pa sa Central Visayas Pork Producers Cooperative human gihingusgan ang pag-estrikto sa pagsulod niini sa kamerkaduhan.
Matud pa ni Central Visayas Pork Producers Cooperative president Rolando Tambago nga miabot na og tonelada nga mga imported nga karneng baboy ang nasakmit sa mga meat inspectors sa iyang gipahigayong inspection matag adlaw. Kahinumduman nga mipagawas og executive order si Gob. Gwendolyn Garcia nga naghingusog sa pagpatuman sa Administrative Order sa Department of Agriculture kalabot sa tukmang paagi sa pagbaligya sa mga imported meat.
Matud pa ni Tambago nga sukad nga gipatuman kini dako na kaayo ang ilang nakitang kausaban sa pagbaha sa mga imported meat dinhi sa Sugbu.
Nunot niini malaumon si Tambago nga mapahugtan na gyud og maayo ang pagmonitor sa mga imported meat human sa meeting sa mga meat inspectors dinhi sa lalawigan.
Samtang si Dr. Romeo Capa, regional technical director sa National Meat Inspection Service miingon nga ang karne kinahanglan nga moagi gyud og inspeksyon una pa kini ibaligya. (BANAT)