CEBU, Philippines - Maayong pagkaugdaw sa tulo ka panimalay human kini nasunog kagahapon pasado alas kwatro sa hapon sa Lower Villa Bulsita Bulacao Pardo.
Base sa report sa DyAB nasayran nga nahitabo ang maong sunog sa Alcover Compound diin giingong naggikan sa panimalay sa usa ka Estrella Ligan. Wala pa masayri kun unsa gyud ang hinungdan sa maong sunog kini tungod kay nagkalain-lain lang ang alegasyon sa pipila ka residente.
Giingong adunay usa ka bata nga nagkalingaw og duwa og posporo, samtang aduna usab nagbutyag nga adunay lamparilya nga gigamit sa taas nga bahin sa panimalay ni Ligan ug giingong natumba kini nga maoy hinungdan sa pagkasunog.
Dugang pa niini nga walay kuryente sa maong lugar hinungdan nga migamit nalang og lamparilya nga maoy usa sa gidudahang hinungdan sa pagkasunog.
Nasayran usab nga nakontrolar ang maong sunog sulod lang sa tulo minutos ug bisan paman sa kahuot sa maong lugar tulo ka lang ka balay ang naapektahan ug napugngan dayon ang pagkatap niini.
Gibana-bana nga adunay 15 metros ang gilay-on gikan sa highway patubang sa maong lugar apan dali ra usab kini nga naalarmahan sa Pardo Fire Station.
Kasamtangan pa usab nga gisusi sa imbestigador sa Fire Department ang kantidad sa danyos sa sunog ug ang hinungdan sa pagkasunog sa tulo ka panimalay. (BANAT)